मजदूर दिवस विशेष
आदि काल सँ मेह मे बान्हल
घूमि रहल मजदूर
हाँकि रहल छै पैना लय हाकिम
बैसल कूर्सी पर दूर
दू रोटी के कारण सबटा
कष्ट सहैए लोक
जकरा लग मे संपति छै ओ
भोगि रहल निधोक
मजदूर कते एहनो कहबैछ जे
मोकना धन्ना सेठ
खेनरा ओढ़ि कय घी पीबय आ
अलगेने बैसल पेट
असल मजूरक कर्मे विधना
लीखल भोतहा पेन
कतबो खटब’ कतबो मरब’
तैयो नहि मन मे चैन
मई दिवसक एहि अवसर पर
श्रमिक के करी प्रणाम
जीवन सुखी अहाँ के रहय
से मणि के शुभकाम ।।
मणिकांत झा, दरभंगा
